27 MARZO- DÍA MUNDIAL DO TEATRO

 27 MARZO

DÍA MUNDIAL DO TEATRO

Para conmemorar este día a biblioteca do centro, con Xalín a súa fronte, fixo de ponte para achegar os recursos que ofrecen as Bibliotecas Escolares de Galicia  (a través dos centros de recursos, CFR) ás diversas aulas. 

Contamos así, en servizo de préstamo,  con diferentes obras deste xénero destacando  entre elas un libriño El pequeño teatro de Rebecca que ben pode ser considerado, ademais de dramático,  unha verdadeira obra de arte. 

"XARDÍN POÉTICO DE ROSALÍA"

 XARDÍN POÉTICO DE ROSALÍA

                

Marzo é un mes cargado de días sinalados. A chegada da primavera abre as portas a conmemoracións moi destacadas como son:

-21 de marzo: Día da Poesía e o Día da árbore

-22 de marzo: Día Mundial da Auga 

Días moi especiais e significativos por todo o que representan. 

Por un lado temos dous piares fundamentais para a vida que actúan conxuntamente para regular o clima, purificar o aire e abastecernos de auga doce. Por outro, unha ferramenta potentísima para desenvolver a creatividade, a empatía, a expresión de sentimentos e a intelixencia emocional. 

Unindo todas estas temáticas e, en colaboración, con Voz Natura inauguramos o Xardín Poético de Rosalía. Un espazo botánico creado dentro dunha das zonas verdes do noso cole onde os nenos/as das diferentes aulas plantaron diversas especies: un limoeiro, unha roseira, amorodos, romeu, lavanda, violetas, pensamentos, oliveira, xazmín, camelia...

Todas estas plantas forman parte dos poemas e outras obras literarias da gran poetisa galega,  Rosalía de Castro, e sobre as que se editou o marabilloso libro " O herbario de Rosalía". Herbario que serviu de faro durante esta actividade e que, sen dúbida, une á perfección: poesía, plantas e mesmo, auga; fundamental no planeta Terra.

Deixámosvos  aquí algunhas fotos da xornada, e mesmo os poemas que os nenos/as recitaron durante a propia plantación. 

Un xardín precioso que coidaremos para sempre  entre todos/as!!

SEMANA DA PRENSA- 9 AO 13 DE MARZO

 

SEMANA DA PRENSA

NA ESCOLA

Hoxe comezamos a semana cunha nova misión que nos encargou Xalín: entregar polas aulas diversos xornais infantís do Papagaio e revistas Caracola, Reportero Doc, Kids e Pantera xa que estamos na Semana da Prensa na Escola. 

Un recurso máis para achegar ao alumnado á lectura e á información nun formato diferente, atractivo e motivador.  De feito, sérvenos para aprender tanto nas Horas de Ler como nas áreas curriculares, xa que a partir deles pódese facer infinidade de actividades de expresión oral, escrita, plástica...

A ler moito, peques!

8M- DÍA INTERNACIONAL DA MULLER

 8M- DÍA INTERNACIONAL DA MULLER

Ao longo da historia a loita das mulleres pola igualdade de dereitos, condicións laborais, participación política, recoñecemento... foi unha realidade en todas as partes do mundo. O 8M conmemora e reivindica  a súa valía en igualdade ca do home e pretende visibilizar o seu papel imprescindible na sociedade do pasado, presente e futuro. 

Este curso o alumnado de todos os niveis educativos deu a volta ao planeta investigando en profundidade a biografía de moitas mulleres relevantes que acadaron fitos moi, moi importantes e romperon unha barreira no seu momento. Mulleres que abriron camiños e que nos amosaron a tod@s que os anhelos e as metas non teñen xénero;  so traballo, adicación e esforzo. 

 

Por continentes: 

    

As Mulleres do mundo cuxa traxectoria está recollida en montóns de libros  que temos na Biblioteca de Xalín. 

Cabe destacar que este traballo foi levado a cabo en toda a semana do 8M. Ademais tivemos a sorte e o privilexio de poder asistir a un espectáculo educativo a cargo do Mago Paco "Unha maxia diferente" grazas a xentileza do Concello de Meira. 

Mil graciñas a tod@s! 

FORMACIÓN ELBE.2 PARA FAMILIAS

 

LECTURA E FAMILIAS 

DE 5º E 6º DE ED. PRIMARIA

As bibliotecas escolares dos centros educativos galegos de titularidade da Consellería, integrados no PLAMBE, como é o caso do noso cole, ofrecen unha plataforma online, unha biblioteca virtual, ELBE.2. Nela o alumnado, co seguemento da familia ao tratarse dun recurso en rede, pode acceder en forma de préstamo a diversos libros e mesmo audiolibros. 

O vindeiro martes, 10 de marzo ás 18:30 terá lugar unha sesión de formación sobre esta plataforma que está accesible neste curso para o alumnado de 5º e 6º de Ed. Primaria. Para poder anotarse so tedes que pinchar directamente na imaxe, escanear o código QR ou entrar na propia plataforma: ELBE. 2

 

FORMACIÓN ALUMNADO- BIBLIOTECA DE XALÍN

 

FORMACIÓN ALUMNADO

BIBLIOTECA DE XALÍN

Este xoves e venres 26 e 27 de febreiro leváronse a cabo dúas pequenas sesións de formación arredor da biblioteca de Xalín e outros recursos de lectura dirixidas ao alumnado de 5º e 6º de Ed. Primaria. 

Nestas sesións de formación explicouse a organización dos fondos da nosa biblioteca, a interpretación das etiquetas e as diversas formas de búsqueda en catálogo tanto físicamente como on-line a través do buscador OPAC.   Entregouse así mesmo un tríptico para cada aula no que figura a disposición dos recursos segundo a CDU tentando facilitar o uso autónomo. 

Ao mesmo tempo aproveitouse para explicar de novo o funcionamento da plataforma ELBE.2 e entregar os contrasinais actualizados. 

En vindeiras semanas continuaremos co alumnado doutros niveis. 

23 DE FEBREIRO, DÍA DE ROSALÍA DE CASTRO

 

23 DE FEBREIRO,

 DÍA DE ROSALÍA DE CASTRO

O 23 de febreiro é unha data moi sinalada. Tal día coma ese no ano 1837 nacía a escritora que iniciou o Rexurdimento das nosas letras, Rosalía de Castro. 

Tan grande foi o seu legado como o é o conxunto das súas obras. De entre todas elas, o poema, Miña casiña, meu lar, ocupa, sen dúbida, un lugar moi, moi privilexiado para todos nós. 

Por iso, este ano, tendo en conta o lema das Bibliotecas Escolares de Galicia, O deseño, e partindo da fermosa obra  que leva por título Miña casiña, meu lar  ilustrado pola marabillosa Blanca Millán;  cada clase rediseñou e recitou uns versos para entre todos/as compoñer este fabuloso poema tan cargado de sentimento e tan galego. 

Todas as láminas forman parte dunha exposición que se pode ver na zona do galpón.

 Aquí tedes o vídeo final. Quedou precioso!

Grazas rapaces e rapazas! Fabuloso traballo!