NOVEMBRO,
MES DA CIENCIA EN GALEGO NAS BIBLIOTECAS ESCOLARES
O futuro é ciencia, é investigación e desenvolvemento. Dende fai uns anos novembro é o mes escollido para fomentar a experimentación científica a través da lingua galega. Dous exemplos xeniais disto foron os experimentos levados a cabo polo alumnado de 1ºA: A VIAXE DOS XERMES e polo alumnado de 5º: A VEXIGA NATATORIA DOS PEIXES.
Por un lado, en 1º investigaron como pasan os xermes que poidamos ter nas mans aos alimentos e destes ao interior do noso corpo a través da súa inxesta. Aprenderon así, entre outras moitas cousas, a vital importancia do lavado de mans antes de manipular a comida no día a día. Finalmente, como bos científicos/as recolleron todas as súas hipóteses, procedementos e conclusión nun libriño.
Noraboa a todos/as polos vosos marabillosos experimentos!
OBRADOIRO PLANTAS AUTÓCTONAS
Entroncado co programa Lectura e Familias da biblioteca escolar e co proxecto de Voz Natura que versa sobre a fauna e flora autóctona, onte tivo lugar un enriquecedor obradoiro sobre as plantas da nosa contorna. Durante a xornada, dirixida ao alumnado e familias de 5º e 6º de Educación Primaria, Alba e Óscar, axentes do territorio (XELDA) achegáronnos unha valiosísima información para o estudo e coñecemento das plantas autóctonas. Así, afondaron arredor das súas partes, da importancia das mesmas para o planeta, dos tipos e usos que lles damos, así coma chaves dicotómicas para facilitar a súa clasificación.
Proximamente toda esta aprendizaxe culminará cunha práctica real, noutra sesión deste obradoiro, na que se fará fincapé na identificación e clasificación das diferentes especies da flora que medran arredor do centro educativo. Non hai mellor experiencia que vivenciar en primeira persoa o estudado.
Moitísimas grazas a todas as partes pola implicación e colaboración.
Estade moi atentos/as, a ver que plantas nos acompañan día a día...Pensades que as coñecedes todas?
LEONORA CARRIGTON
Posiblemente se tivésemos que asociar o mes de novembro a unha emoción, medo, sería unha das máis pronunciadas por cada un de nós. Espíritos, esqueletos, defuntos, meigas... son termos moi relacionados coas tradicións festexadas a comezos deste mes e vencelladas a súa vez con esa sensación aterradora.
O medo é unha emoción fundamental do ser humano e ao longo da nosa historia, permitiunos sobrevivir coma especie. Saber expresar as emocións forma parte da tan necesaria educación emocional e este mes tiñamos un reto que nos podía axudar a canalizalo e facerlle fronte.
O reto, proposto por Xalín e o seu equipo e que tiña cabida no espazo de BIBLIO-ART, consistía en investigar as obras de Leonora Carrigton, unha pintora e escritora surrealista inglesa. Investigando os seus cadros os nenos/as tiveron a oportunidade de coñecer o título dos mesmos, a posible interpretación e simbolismo que tiña para a súa autora os diferentes elementos que pintaba, pero especialmente, puideron expresar o que estes lles suxerían, os seus sentimentos e sensacións.
Unha investigación inquietante,👀👀!
MOCHILAS VIAXEIRAS
O pasado día 24 de outubro, no día das Bibliotecas, comezaron a súa andaina 2023/2024 as nosas mochilas/bolsas viaxeiras. Unha actividade pensada para compartir e gozar en familia, de feito, está programada dentro do marco de "Lectura e familias".
Sen dúbida, unha oportunidade fantástica para vivir unha viaxe chea de aventuras. Lembrade que tedes a vosa disposición un caderniño para compartir con todos/as nós as vosas experiencias, sensacións, sentimentos...
GIUSEPPE ARCIMBOLDO
A apertura do recuncho BIBLIO-ART dentro da biblioteca escolar trouxo consigo un espazo para a creatividade, a orixinalidade, a imaxinación e o xogo coas artes plásticas, pero tamén un recanto para a cultura. Entrelazando obxectivos ademais co plan de alimentación saudable no que está inmerso o centro escolar parecéunos moi interesante adentrarnos nas obras de Giuseppe Arcimboldo.
Este singular pintor italiano, recoñecido polas súas creativas representacións do rostro humano a partir de flores, froitas, animais....,permitiu aos nenos/as facer as súas propias creacións de caras a partir de debuxos e imaxes de alimentos. Foi unha experiencia moi divertida á vez que cultural, non vos parece?
A quen coñeceremos en novembro?.... Non vos quededes coa dúbida!!
O tempo de lecer sempre é un tempo moi agardado por todos os alumnos/as. Observalos neste intre permite contemplar a maxia da infancia; unha etapa vital na que a inocencia, a vitalidade, a ilusión, a curiosidade e a alegría, podería dicirse que acadan a súa máxima expresión.
A biblioteca escolar do noso colexio leva xa moito tempo conseguindo ser un lugar de encontro, de tempo e actividades compartidas. Non obstante, ás veces estes momentos merecen ser fotografados para que o seu recordo quede inmortalizado, acadando o verdadeiro valor que teñen.
Así, deixámosvos unhas imaxes dun venres, un día calquera. Emocionantes, falando por sí soas, sen dicir palabra. Nenos e nenas compartindo tarefas, xogos, lecturas, pesquisas; momentos, emocións, sentimentos.... Enriquecedor, sen dúbida.
A apertura da biblioteca escolar tivo unha acollida por parte de todos os nenos/as excepcional. Viviron con gran intensidade e fervor o agardado día, gozando tanto da lectura como doutras actividades inauguradas para este curso, como o espazo de "BIBLIOART".
Xalín sorría entusiasmado vendo a súa casiña tan chea coma un formigueiro. Sen dúbida, non podes perderte a experiencia! Se aínda non fuches por alí, a semana que vén achégate. Non deixes pasar un día máis!
Xalín xa vos pedía que estiverades moi atentos/as, que pronto ían comezar as novidades deste curso... e, por fin, chegou o agardado día!
Baixo o lema das bibliotecas escolares 2023/2024, " Unha biblioteca escolar en viñetas", Xalín preparou unha xornada colectiva no galpón. Alí todos e todas puidemos gozar da audición de emocionantes, pero tamén, divertidísimos contos e poemas en diversos idiomas. Non me digades que o conto "Non abras este libro" non vos tiña ben intrigadiños/as!!!
Así, para que cada un de vós axudedes á vosa mestre/a a preparar un lote de contos ou libros que máis vos gustan ou atraen, a mascota da biblio agasallouvos cunha caixa por aula, para facer uso dela na hora de ler. Escollede ben, para pasar un rato moi, moi ledo. En que vos convertiredes a próxima semana?
Que aventura vivirás?
Se non te mergullas nun conto, non o saberás!
E non esquezades que a partir de hoxe podedes ir visitar a Xalín á biblioteca. Non hai cousa que máis lle guste que vervos por alí lendo entretidos!
Ata a seguinte....
Bo día!
Todo o alumnado do centro participou na elaboración dun libro dixital adicado ao bo uso da auga e da enerxía baixo o título de "Nós tamén queremos...salvar o planeta!".
Para poder velo, podes clicar neste enlace.
Da man do clube de lectura e, aproveitando que o alumnado de 4º, 5º e 6º xa leron o seu libro "Plan de rescate", Antía Yáñez fixo unha visita ao cole o pasado venres. O alumnado fixo mil e unha preguntas, nótase que o libro lles encantou. Grazas Antía por unha sesión de aprendizaxe, lectura e ilusión.
No cole temos un montón de poetas e, aproveitando o día do arte en galego, propuxemos ao alumnado a creación de caligramas. Queredes velos? Aquí tedes unha mostra!
O pasado martes, 18 de Marzo tivemos a sorte e o pracer de poder levar a cabo o II Encontro Interxeracional, dentro da actividade " C...
