23 ABRIL - DÍA DO LIBRO

  23 DE ABRIL, DÍA DO LIBRO, 

CITA EN FAMILIA CO CÓMIC.

Cada 23 de abril conmemorase o Día Mundial do Libro para promover o desfrute dos libros e da lectura.

 A data non é froito da casualidade, senon que busca tamén render unha merecidísima homenaxe a escritores da literatura universal como os grandes: William Shakespeare, Miguel de Cervantes e Garcilaso de la Vega. 

O poder dos libros é inexplicable: serven de unión entre o pasado e o presente, entre avós/avoas e netos/as, entre civilizacións e culturas, permite enriquecernos, cambiar a mirada ou o pensamento sobre moitas cousas que cremos coñecer, danos a oportunidade de voar, viaxar, imaxinar e soñar.

  Unha oportunidade que non podemos nin debemos perdernos, ler. 

No noso cole, este día quixemos adicarllo en especial ao CÓMIC, aproveitando que este curso o lema das bibliotecas escolares é: "Unha biblioteca escolar en viñetas". 

De feito aquí vos deixamos fotos deste marabilloso día, as familias acudindo á exposición para celebrar o día do libro,  nenos/as desfrutando da lectura dos cómics no tempo de lecer e na hora da ler. Fabuloso! 

Lembrade que tedes a vosa disposición na casiña de Xalín (durante toda esta semana no periodo de lecer para os nenos/as e para as familias  de 15:00- 16:00) esta completa exposición cos fondos, tanto do centro como os aportados por todas as familias que así o desexaron. Agardámosvos!

BIBLIO-ART

 

BIBLIOART

Co transcurso dos meses foron chegando os retos de BIBLIO-ART e os nenos/as estiveron dispostos a afrontalos con valentía, experimentando e investigando sobre o xenial mundo da arte. 

Así, en decembro, adentráronse  un pouquiño na historia do enigmático artista que emprega como seudónimo Bansky, quen a pesares de ser famosísimo pouco en realidade sabemos del. Así de creativas quedaron algunhas das representacións das súas obras. 

O mes de xaneiro adicámosllo a Pablo Picasso coincindo coa conmemoración, o día 30, do Día Escolar da Non Violencia e da Paz, por ser un dos pintores e escultores máis representativos do cubismo, movemento artístico desenvolto a comezos do S. XX. A pomba da paz símbolo piccasiano por excelencia forma parte así da iconografía  máis coñecida deste xenio malagueño. 

Os alumnos/as crearon orixinais versións das súas obras, dignas de exposición. 

En febreiro, a investigación e a creación plástica xirou arredor da artista galega, Maruja Mallo.  De entre todas as obras desta pintora surrealista pertencente a xeración dos 27 os nenos/as traballaron sobre a obra  Naturaleza viva con rosa. 

Velaquí tedes as súas obras artísticas: 

Finalmente, o mes de marzo, conmemorando o día da árbore, coñecemos a Gustav Klimt, un pintor simbolista austriaco  representante do movemento  modernista que manifestou sempre un estilo, moi, moi persoal e que podemos apreciar nunha das obras máis famosas, El árbol de la vida. 

SEGADORES DA ÓRREA EN TERRAS DE CASTELA

 SEGADORES DA ÓRREA

O alumnado de 5º e 6º xunto co seu equipo docente tivo o privilexio de asistir na biblioteca do noso centro escolar ao visionado do documental  "SEGADORES DA ÓRREA EN TERRAS DE CASTELA, unha historia de heroes", obra dirixida por Vanesa Gómez Lourido e Laura Alonso Carracedo. 

Na presentación da mesma puideron coñecer como 31, persoas nadas na Órrea- Riotorto, A Terra de Miranda contan de primeira man a experiencia da participación dos labregos galegos nas Segas de Castela, fenómeno histórico e sociolóxico que en Galicia durou 300 anos, dende o século XVII ata os anos sesenta  do pasado século XX cando xa a mecanización definitiva do agro castelá acabou con esta forma de migración temporeira. 

Noraboa polo documental a tod@s que o fixeron posible, merecidísima homenaxe a todas esas persoas que se enfrontaban a aquel duro traballo cunha calor abafante  mentres loitaban contra o peso de ter tamén que deixar a súa querida terra galega. 

 ÁRBORES, AUGA E POESÍA

O 21 de Marzo é o Día Mundial da Poesía. Esta conmemoración promovida pola Unesco en 1999 ten como obxectivo apoiar a diversidade lingüística a través da expresión poética.  

Non obstante, en todo o mundo o 21 de Marzo celébrase tamén o Día Internacional dos Bosques. Un evento proposto pola ONU nunha convención sobre o Cambio Climático que busca concienciar sobre a necesidade da conservación dos bosques e ecosistemas destacando cómo estes axudan a mitigar o cambio climático ao actuar como sumidoiros de dióxido de carbono.  De feito, o lema para este ano 2024 é " Bosques e innovación. Novas solucións para un mundo mellor". 

E o 22 de Marzo é o Día Mundial da Auga, unha iniciativa global respaldada pola ONU dende 1993 para destacar a importancia da auga doce para o noso planeta e chamar así a atención sobre a necesidade dunha xestión sostible da mesma. 

Para levar a cabo unha celebración conxunta  os nenos/as escribiron e recitaron poemas adicados a árbores autóctonas de Galicia. Trala lectura dos mesmos, plantouse unha xesta en honra ao poema de Avelino Díaz, As Xestas. 

ENCONTRO- COLOQUIO "LITERATURA INFANTIL CON PERSPECTIVA DE XÉNERO"

                                                            

     ENCONTRO - DEBATE

" LITERATURA INFANTIL CON PERSPECTIVA DE XÉNERO"

O martes 19 de Marzo na biblioteca de noso centro escolar tivo lugar un enriquecedor encontro-debate "Literatura Infantil con perspectiva de xénero", a cargo da directora da Biblioteca Pública Provincial de Lugo,  Mª Isabel Pérez Fórneas. 

Previamente nas aulas, na hora de ler o profesorado achegou libros de préstamos da biblioteca municipal de Lugo para convidar ao alumnado a reflexión. Estes fondos  escollidos pola súa temática educativa, coma Con Tango son tres, Non a todas as nenas lles gusta o rosa, El príncipe Serafín....foron o punto de partida sobre o que se xirou o debate, facendo unha análise do potencial destes recursos. 

A xornada foi aberta a toda as familias, non obstante, a acollida non foi a agardada. 

Aquí deixamos unhas imaxes do encontro, agradecendo a Mª Isabel a súa implicación e colaboración co noso centro. 

SEMANA DA PRENSA

   SEMANA DA PRENSA 

DO 4 AO 8 DE MARZO

Estes días celebramos no centro a Semana da Prensa na Escola. O xornal como material didáctico ten infinidade de posibilidades: fomento da lectura,  do espírito crítico, da escritura, da creatividade....Un fabuloso exemplo deste potencial témolo aquí cos nenos e nenas de 1º A, converténdose así en: 

  -Rigorosos xornalistas, redactando as novas da semana. 

 - Grandes lectores, facendo unha análise dos textos das diferentes seccións. 

  -Intrépidos aventureiros: mergullándose nos pasatempos 

Noraboa rapaces e rapazas!

1º REUNIÓN DO CLUB DE LECTURA DE 5º

  

                                         CLUB DE LECTURA DE 5º DE ED. PRIMARIA

Hoxe todos as persoas integrantes do club de lectura de 5º tiveron unha cita especial, a primeira reunión de lectores. A súa misión era elaborar a portada da axenda de lectura e programar as datas de reunións vindeiras. Case nada!!

Agora déixovos por aquí unhas fotiños da sesión de traballo. E, sen dicirvos nada, dígovolo todo... nelas podedes ver o título da obra que van ler! Ten moi boa pinta! 

A gozar da experiencia rapaces e rapazas! Benvidos a un novo reto!

ROSALÍA DE CASTRO- 23/2/2024

                                                                               

                 ROSALÍA DE CASTRO 

Tal día coma hoxe no ano 1837 nacía a escritora que iniciou o rexurdimento das nosas letras, Rosalía de Castro.  

Hoxe dende o noso centro educativo os nenos e nenas rendéronlle unha merecidísima homenaxe cuns "MENÚS POÉTICOS", saboreando así a riqueza da nosa lingua e alimentando a imaxinación, a creatividade e a curiosidade. 

Aquí vos deixamos un anaquiño dos seus fabulosos traballiños. 

Noraboa a tod@s e moitísimas grazas pola vosa implicación e compromiso! 

LABORATORIO DE RADIO

                                                               RADIO ESCOLAR

O venres 16 de febreiro o alumnado de 4º, 5º e 6ºde Educación Primaria comezou a súa andaina nun novo espazo metodolóxico, a RADIO ESCOLAR. Nel puxeron en marcha un pequeno proxecto arredor do manexo básico da mesa e creación de podcast. 

Por unha parte, o alumnado de 4º aproveitou esta poderosa ferramenta para entrevistar a coordinadora da Biblioteca Escolar e mestra titora de 5º, Mariluz Iglesias, desenvolvendo así  as súas competencias comunicativas, habilidades sociais e competencias dixitais. 

E, por outra parte, o alumnado de 5º e 6º, por grupos,  traballaron as competencias lingüísticas e dixitais a través de gravacións de diversos relatos aos que incorporaron múltiples efectos de sons, xogando coas posibilidades da mesa. 

                                                                           Xenial locutores/as!