LECTURA E FAMILIAS - OBRADOIRO PLANTAS AUTÓCTONAS

   OBRADOIRO PLANTAS AUTÓCTONAS

 Entroncado co programa Lectura e Familias da biblioteca escolar e co proxecto de Voz Natura que versa sobre a fauna e flora autóctona, onte tivo lugar un enriquecedor obradoiro sobre as plantas da nosa contorna. Durante a xornada, dirixida ao alumnado e familias de 5º e 6º de Educación Primaria, Alba e Óscar,  axentes do territorio  (XELDA) achegáronnos unha valiosísima información para o estudo e coñecemento das plantas autóctonas. Así, afondaron arredor das súas partes, da importancia  das mesmas para o planeta, dos  tipos e usos que lles damos, así coma chaves dicotómicas para facilitar a  súa clasificación. 

 

 

Proximamente toda esta aprendizaxe culminará cunha práctica real, noutra sesión deste obradoiro, na que se fará fincapé na identificación e clasificación das diferentes especies da flora que medran arredor do  centro educativo. Non hai mellor experiencia que vivenciar en primeira persoa o estudado.  

Moitísimas grazas a todas as partes pola implicación e colaboración. 

Estade moi atentos/as, a ver que plantas nos acompañan día a día...Pensades que as coñecedes todas?

 

LECTURA E FAMILIAS- APICULTURA

UNHA XORNADA CON SABOR A MEL

 O pasado venres, 17 de novembro, tivo lugar no cole un encontro fabuloso entre familias, nenos/as e mestres, baixo o lema " As familias coa natureza".  Coa finalidade de adentrarnos no fascinante mundo das abellas tres familias de alumnos/as ( unha por cada ciclo de Ed. Primaria) que se adican a apicultura encargáronse de achegarnos de forma práctica as técnicas de cría das abellas, de recolección do mel, ao coidado que precisan as colmeas, o proceso para desopercular, e especialmente, a importancia destes insectos para a polinización e a conservación dos ecosistemas.  Unha actividade fundamental no eixo da educación ambiental desenvolvida co apoio do programa Voz Natura, que ten como temática central a protección da fauna e da flora autóctonas. 

Como colofón final os alumnos/as envasaron mel producido nos propios apiarios destas familias e puideron degustar o seu extraordinario sabor.

 

Moítisimas grazas por compartir con todos nós as vosas experiencias e aprendizaxes e sobre todo, por facer tanto pola natureza.  

Aquí vos deixamos algunhas fotos para memorar este tempo compartido. 

Por moitas máis vivencias así!
 

RETO NOVEMBRO: LEONORA CARRIGTON

 LEONORA CARRIGTON

Posiblemente se tivésemos que asociar o mes de novembro a unha emoción, medo, sería unha das máis pronunciadas por cada un de nós.  Espíritos, esqueletos, defuntos, meigas... son termos moi relacionados coas tradicións festexadas a comezos deste mes e vencelladas a súa vez con esa sensación aterradora.

 O medo é unha emoción fundamental do ser humano e ao longo da nosa historia, permitiunos sobrevivir coma especie. Saber expresar as emocións forma parte da tan necesaria educación emocional e este mes tiñamos un reto que nos podía axudar a canalizalo e facerlle fronte. 

O reto, proposto por Xalín e o seu equipo e que tiña cabida no espazo de BIBLIO-ART, consistía en investigar as obras de Leonora Carrigton, unha pintora e escritora surrealista  inglesa. Investigando os seus cadros os nenos/as tiveron a oportunidade de coñecer o título dos mesmos, a posible interpretación e simbolismo que tiña para a súa autora os diferentes elementos que pintaba, pero especialmente, puideron  expresar o que estes lles suxerían, os seus sentimentos e sensacións.  

Unha investigación inquietante,👀👀!

UNHA NOVA ANDAINA DAS MOCHILAS VIAXEIRAS

 

MOCHILAS VIAXEIRAS

O pasado día 24 de outubro, no día das Bibliotecas, comezaron a súa andaina 2023/2024 as nosas mochilas/bolsas viaxeiras. Unha actividade pensada para compartir e gozar en familia, de feito, está programada dentro do marco de "Lectura e familias". 

Sen dúbida, unha oportunidade fantástica para vivir unha viaxe chea de aventuras. Lembrade que tedes a vosa disposición un caderniño para compartir con todos/as nós as vosas experiencias, sensacións, sentimentos...