REVISTA PETISCOS
2024/2025
Rematamos o curso con moi bo sabor de boca e nada mellor que degustar o menú elaborado polos e polas grandes chefs que temos no Ceip Plurilingüe Poeta Avelino Díaz.
Esperamos que sexa do voso agrado que ben merece unha estrela!!
Aquí vos deixamos o enlace desta xenial recompilación de receitas: PETISCOS
RECOÑECEMENTO AO VOLUNTARIADO:
BIBLIOTECAS SOLIDARIAS
Colaborar dun xeito altruísta sempre reconforta e nos aporta sensacións indescritibles. O programa de Bibliotecas Solidarias pretende que a través da biblioteca e da lectura se tezan redes de colaboración, unión, bondade e xenerosidade. Este ano 33 nenos/as de 5º e 6º animáronse a participar durante todo o curso en diferentes tarefas, implicándose e amosando unha actitude moi solidaria.
Hoxe, como non podía ser doutro xeito, tocaba agradecerlles e recoñecerlles o seu bo facer ao longo destes meses, brindando sempre un man para colaborar e axudar en todas as actividades nas que participaron: Lecturas ao máis pequenos/as na biblioteca nos períodos de lecer, xestión do préstamo de libros, colocación de fondos na biblioteca, lecturas ao bebés da Escola Infantil, encontros con maiores da Residencia de Maiores e locucións de audiocontos en Xaoín, Radio Avelino.
Así, procedemos á entrega dos Diplomas: o outorgado dende a Biblioteca de Xalín e o outorgado dende a Consellería xunto cuns pequenos agasallos. Moi merecido rapaces e rapazas!
Xalín está moi orgulloso de vós/vosoutras!
E con este agradecemento, despedímonos por este curso. Feliz verán!!
ENCONTRO CON ANDREA BARREIRA
AUTORA DE: QUEN PRECISA UNHA AVOA?
Este luns, 16 de xuño o alumnado de 5º e 6º de Ed. Primaria tivo a sorte de poder coñecer en persoa a autora do libro Quen precisa unha avoa?, Andrea Barreira Freije. Esta escritora galega, nativa de Fonsagrada, recibiu con esta obra o premio VII Premio Agustín Fernández Paz pola Igualdade no 2024.
E esta foi a novela coa que se mergullaron nos dous Clubs de Lectura destes niveis de Ed. Primaria e que lles permitiu non so reflexionar sobre a sabedoría dos nosos maiores, as tradicións, os contos e lendas do pasado, senón tamén sobre as tarefas escolares, as relacións entre compañeiros/as, a amizade... E mesmo, fixeron un trivial para xogar sobre o libro con preguntas e respostas ben, pero que ben entretidas!
Andrea moi próxima ao alumnado brindouse a resolver todas as inquedanzas, curiosidades e preguntas con xenerosidade e contoulles toda a historia que había detrás deses pequenos detalles que saen nos diferentes capítulos e que fan voar a imaxinación mentres manteñen a intriga nesa aventura de secuestrar avoas.
Grazas Andrea pola túa implicación, por agasallarnos coa túa magnífica escritura e, por suposto, co teu tempo!
APRENDENDO DENDE A EXPERIENCIA E A EMOCIÓN
O pasado xoves, 12 de xuño levamos a cabo o encontro final interxeracional; unha data moi especial e agardada.
O alumnado voluntario de 5º e 6º que participa no programa de Bibliotecas Solidarias tivo o pracer de visitar e acompañar aos maiores do centro residencial de Meira dentro da actividade final do proxecto compartido entre a nosa escola e o CAM: CÓDICES VIVOS.
Á chegada, nun primeiro momento reuníronse con Dolores, Obdulia, Mary e Luísa para compartir con elas as súas reflexións e impresións tras os primeiros encontros e despois todos xuntos/as saímos a dar un paseo polo parque da vila, ao pé do Río Miño. Andaina á que se uniron máis persoas usuarias da residencia. Un paseo precioso que aproveitamos para facer inesquecible coa lectura de sentidos poemas que os nenos e nenas lles escribiron a modo de homenaxe e agradecemento.
Coidar e brindar tempo sempre é en sí mesmo un agasallo, o verdadeiro agasallo. Foi un día especial para maiores e nenos/as porque nos enriquecemos mutuamente.
Un encontro fabuloso que xa nos tarda en repetir; as fotos falan por sí soas....
AUDIOCONTOS CON XAOÍN
Durante este curso 2024-2025 unha das
propostas dentro do programa Bibliotecas Solidarias para o alumnado voluntario
de 5º e 6º de Ed. Primaria era participar na preparación e gravación de
audiocontos, é dicir, contos narrados a través da emisora de Xaoín,
Radio Avelino.
E, despois de sesións arduas de traballo
preparando as escaletas aquí tedes os xeniais audiocontos. Unha ledicia poder
escoitar a estes/as locutores/as tan metidos no papel dos diferentes personaxes.
Escoitade, escoitade e a gozar!
LUIS ABEL DA FUNDACIÓN BREOGÁN,
EN XAOÍN, RADIO AVELINO
O alumnado de 5º de Ed. Primaria entrevistou a Luis Abel Taboada, máis coñecido como Fus, xerente da Fundación Breogán. Os nenos/as tiveron a sorte de adentrarse nos principais proxectos que esta Fundación impulsa en centros educativos, como o noso. " Ningún aro sen rede". Non vola podedes perder porque é moi, pero que moi interesante!
Grazas Luis, polo teu tempo e pola implicación en iniciativas tan xeniais como esta mesturando deporte, educación e conciencia medioambiental e solidariedade.
Un pracer! Parabéns ao equipo de locutores e locutoras! Magnífico traballo!
EN XAOÍN, RADIO AVELINO
O pasado 27 de maio alumnado de 5º de Ed. Primaria tivo o pracer e a sorte de poder entrevistar a Alba González, unha das integrantes do grupo de folclore galego da vila, Nove Ferreñas e coñecer así moitos aspectos desta agrupación. Graciñas Alba polo teu tempo, a túa xenerosidade e implicación. Grazas por contribuír na divulgación de parte da nosa riqueza: o noso patrimonio inmaterial!
Deixámovos aquí o podcast enteiriño para que gocedes desta marabilla! A gozar!
Parabéns ao equipo de locutores e locutoras!
ENCONTROS INTERXERACIONAIS
COÑECEMOS A LOLA E A MARISA
No mes de maio, os días 6 e 27, tivemos o pracer e a sorte de poder levar a cabo dous Encontros Interxeracionais (dentro do proxecto Códices Vivos) co alumnado voluntario de 5º e 6º de Ed. Primaria (de Bibliotecas Solidarias) e dúas mulleres cheas de vitalidade: Lola e Marisa.
Con elas aprendemos o valor da resiliencia, da forza e da superación en momentos duros e tamén do esforzo, da experiencia e da sabedoría. Impresiona como as vivencias da Guerra Civil se quedaron albergadas na memoria pola súa dureza e como era a vida chea de retos e desafíos cando os recursos eran moi diferentes aos que hoxe coñecemos.
Como a poboación migraba en busca dunha vida mellor, en busca de máis oportunidades. Migracións que ocorreron no pasado, ocorren e seguiranse producindo porque todo ser humano móvese buscando un futuro, un futuro mellor. Impresiona tamén como opcións que temos acotío, antes (e non fai tanto anos) non o eran tanto; ver a televisión ou a optar a sacar o carné de conducir, por exemplo.
Pero tamén como se traballaba en equipo. A veciñanza de pobos enteiros amosando unha inquebrantable unión e loita común. Como se adicaban horas e horas a tarefas duras mais sempre con paixón. Destacan as labores artesanais, coma a complicada e espectacular arte da cestería e, sobre todo, como a pesares de todas as dificultades triunfaba a festa e os momentos cheos de ledicia.
Historias reais de mulleres excepcionais: loitadoras e traballadoras. Exemplos de valentía e coraxe. Xuntanzas para repetir porque... queda tanto por aprender e valorar!
Reiteramos as infinitas grazas a Lola e a Marisa pola súa xenerosidade, así como a Laura e a Tania do Centro Residencial Santa María de Meira pola súa implicación e coordinación para que estes encontros fosen posibles.
O 12 de xuño, viviremos un momento moi agardado e especial!
ENCONTRO CON INMA SOTO
AUTORA DE: XELA, A SUPERHEROÍNA DE ALDEA
O pasado martes, 27 de maio foi un día especial para o alumnado de 1º e 2º de Ed. Primaria. Durante o 2º e o 3º trimestre deste curso botaran a andar os dous clubs de lectura destes niveis e todos e todas gozaran de Xela, a Superheroína de aldea, de Inma Soto, quedando atrapados/as nas diferentes aventuras da protagonista.
Pois ben, este martes por fin puidemos coñecer a persoa que lle deu vida a Xela, a heroína da natureza. Recibimos a visita de Inma Soto no cole!
Un encontro que nos fixo sorrir, cantar, bailar, espertar a imaxinación e aprender que coma ela, temos a misión de coidar a nosa contorna valorando os espazos verdes, cheos de vida, de tranquilidade, paz e saúde. Pequenos xestos, grandes cambios.
E, por enriba, non veu soa, visitáronnos tamén moitos dos animaliños do conto. Canto nos gustaron!
Grazas Inma, por contestar a todas as nosas preguntas, inquedanzas e curiosidades, por asinarnos todos os exemplares con tanto esmero e delicadeza e sobre todo por contribuír a un mundo mellor con lecturas e accións de sensibilización cara a importancia do medio ambiente. Deixáchesnos moi bo sabor de boca!
Agardamos a 2ª parte con moita ilusión!
Aquí deixamos unhas instánteas co broche perfecto para un camiño compartido ben fermoso.
CANTIGAS EN FAMILIA
CON NOVE FERREÑAS
Non hai mellor maneira de comezar unha semana que cantando e bailando toda a comunidade educativa, e máis, se é a través de propostas que axudan a conservar parte da nosa riqueza, do noso patrimonio inmaterial: a nosa lingua, as nosas cantigas.
Alba González e Lucía Portela, dúas integrantes do grupo de folclore popular galego da nosa vila, Nove Ferreñas, amenizáronnos unha xornada especial en familia. Explicáronnos a orixe e traxectoria do grupo, o porqué se chama así, as súas experiencias persoais como cantareiras e como non, ensináronnos un montón de cantigas e instrumentos tradicionais galegos. Ata nos convidaron a bailar con elas no escenario! Unha chulada de foliada!
Moitísimas grazas as dúas por contribuír á transmisión literaria que pertence a toda a comunidade e que se aprende escoitando, cantando, traballando, divertíndose... Deixades unha gran pegada no eido educativo e cultural. Un verdadeiro pracer contar con vós nun día tan significativo. .
Aquí vos deixamos unhas fotos e un vídeo da xornada que, sen dúbida, foi inmensamente fermosa.
Sentimos moito a ausencia de Alba Rodríguez, que hoxe finalmente non puido acompañarnos, e agradécemoslle igualmente a súa intención de participar. Seguro que noutra ocasión podemos cantar e bailar con ela tamén.
Na mesma liña agradecemos as Asociacións " Avelino Díaz " e "Asociación Galega do Xogo popular e tradicional " quenes colaboraron tamén para que este encontro fose posible.
E, non por ser o último menos importante, reiteramos as grazas a todas as familias que nos acompañastes. Grazas por axudarnos a compartir a riqueza cultural da nosa comunidade e apoiar as iniciativas educativas.
Felices Letras Galegas 2025.
MEDRANDO COA LECTURA: O POLO PEPE
VISITA Á EEI DE MEIRA, O VERMIÑO
- ensaios do conto infantil O Polo Pepe
- deseñar unha maqueta do poliño en cartón e tamaño XXL
- elaborar axóuxeres cos grans que se mencionan: trigo, cebada e millo....
Ademais, prepararon a parte musical, cantando a canción e acompañándoa con instrumentos, neste caso, con pandeiretas.
E, finalmente, chegou o gran día, o día da actuación. Diante dun público esixente como son os meniños e meniñas da EEI de Meira, (O Vermiño,) este 12 de Maio maiores e pequenos desfrutaron deste conto-canción. A lectura compartida sempre enriqueceu e enriquecerá o corazón.
Moitísimas grazas ao persoal da EEI por facer posible o encontro e por eses riquísimos aperitivos.
CANTIGAS EN FAMILIA
CON NOVE FERREÑAS
O vindeiro luns, 19 de maio teremos a sorte de poder contar con Alba Rodríguez, Alba González e Lucía Portela, tres integrantes do grupo de folclore popular galego de Meira, "Nove Ferreñas" , con quenes aprenderemos e gozaremos de parte do noso patrimonio inmaterial, a nosa música.
Convidámosvos a todas as familias a asistir a esta xornada de cantigas e acompañar así aos vosos nenos/as neste día especial.
Haberá tres sesións diferentes, en función do nivel educativo do alumnado. So tedes que inscribirvos no seguinte enlace antes do vernes 16 de maio ás 12:00 para ter nós unha previsión do aforo e así organizarnos mellor.
Esperámosvos!
LECTURA E FAMILIAS DE 3º, 4º, 5º e 6º EDUCACIÓN PRIMARIA
As bibliotecas escolares dos centros educativos de titularidade da Consellería, integrados no PLAMBE, como é o caso do noso centro, contan cun novo servizo, E-LBE. 2.
Trátase dunha plataforma de lectura e préstamo de contidos dixitais dispoñibles para ler en pantalla, en todo tipo de dispositivos (computador e distintos móbiles) en calquera momento e lugar. O alumnado de 3º a 6ºde Ed. Primaria , xa ten as súas credenciais persoais e poden facer uso deste recurso máis que complementa á biblioteca física do centro.
O mércores, 7 de maio de 18:00 a 18:45 a Consellería ofrece unha formación on-line para as familias. Se podedes non perdades a ocasión e inscribídevos!
Comezamos esta semana tan especial recibindo a Maleta Viaxeira emprestada pola Asesoría de Bibliotecas Escolares con, nada máis e nada menos, 40 contos novos sobre a diversidade. Un agasallo perfecto para comezar a conmemoración do DÍA DO LIBRO.
Pero, o seu peche foi tamén por todo o alto. Xalín, non puido conter a emoción do que aconteceu este venres no cole!!
Por un lado, nas primeiras horas do día comezamos co "TROCACONTOS", un momento moi emotivo no que moitos nenos/as que desexaron participar intercambiaron os seus contos con outros compañeiros/as. Porque.. sabedes qué? Un conto, sempre é un agasallo perfecto, un agasallo que podes abrir unha e mil veces e que podes compartir coa xente a que máis queres.
Ademais, grazas á colaboración da Asesoría de Bibliotecas Escolares de Lugo, todo o alumnado e profesorado recibiu neste día tan significativo un marcapáxinas para acompañar as súas lecturas diarias.
E, finalmente, o día rematou compartindo lecturas; como non podía ser doutro xeito. Dentro da actividade de "APADRIÑAMENTO LECTOR" os nenos/as de 6º e 3º de Ed. Primaria léronlles aos peques de Infantil, e 4º e 5º desfrutaron da lectura co alumnado de 1º e 2º de Ed. Primaria. Sen dúbida, unha xornada inesquecible!
REVISTA PETISCOS 2024/2025 Rematamos o curso con moi bo sabor de boca e nada mellor que degustar o menú elaborado polos e polas grandes ...
