27 MARZO- DÍA MUNDIAL DO TEATRO

 O lema das Bibliotecas Escolares de Galicia  para este curso 2024/2025 é " A biblioteca escolar, a escena! para ler, interpretar, escribir e sobre todo gozar co TEATRO!  Este xénero literario é un dos que máis ledicia e sorrisos provoca tanto entre os actores e actrices como entre o público. 

Hoxe, 27 de Marzo, é o día Mundial do Teatro; por iso  nesta data sinalada no cole, coa axuda de Xalín, decidimos facer algo especial. 

Na biblioteca contamos este día tamén con varios xogos de expresión corporal e mímica cos que pasalo ben e mellorar habilidades; pero sen dúbida o gran triunfador foi Gestos!

No período de lecer alumnos/as de 4º  deleitaron cunha interpretación do texto teatral "Semba, o medoñento" para todos os asistentes que así o desexaron na biblioteca, unha obra cunha mensaxe fermosa de paz, respecto e diálogo.  A continuación, se pinchades tedes a oportunidade de poder gozar tamén del!

Escoitade, escoitade:.....SEMBA, O MEDOÑENTO

Por outro lado, na hora de ler, alumnos/as de 5º e 6º levaron a cabo unha actividade de teatro lido ao alumnado de Infantil. Cada grupo de actores e actrices interpretou as personaxes dun conto que ten moitísimo éxito entre os neniños e neniñas máis pequeniños/as  e que seguro que vós tamén coñecedes .....nada máis e nada menos que ....CORRE CORRE CABACIÑA!

Escoitade que divertido este conto teatralizado: 

 

CORRE CORRE CABACIÑA EN 3 ANOS

CORRE CORRE CABACIÑA EN 4 ANOS

CORRE CORRE CABACIÑA EN 5 ANOS

II ENCONTRO INTERXERACIONAL

O pasado martes,  18 de Marzo tivemos a sorte e o pracer de poder levar a cabo o  II Encontro Interxeracional, dentro da actividade " Códices Vivos"  entre un grupo de alumnado voluntario e Obdulia, unha muller chea de vida, de vivencias e experiencias, que se volcou cos nenos/as e os acolleu cun agarimo especial no seu cuarto persoal. Compartiu con eles/as as súas lembranzas da infancia e da xuventude, a  marabillosa etapa de iniciarse na lectura co seu primeiro silabario, a súa paixón pola pintura, as pulseiras e o gancho, a súa primeira radio e máis momentos dun valor incomensurable.

A partir desta sesión,  que se nos quedou moi curta, onde o tempo voou, os catro alumnos/as privilexiados plasmarán por escrito as súas impresións, emocións e aprendizaxes. 

Reiteramos as infinitas grazas a Obdulia por brindarnos a oportunidade de aprender dende a experiencia e a emoción: e a Laura e Tania do centro Residencial Santa María de Meira pola organización e colaboración; sen elas este encontro non sería viable. 

Aquí vos deixamos unhas instantáneas porque, como sempre se di; unha imaxe vale máis que mil palabras!!

 

DÍA DA POESÍA, DA ÁRBORE E DA AUGA

 O día Mundial da Poesía celébrase cada 21 de Marzo dende hai 25 anos co obxectivo de que se recoñezan todas as linguas do mundo e que ningunha desapareza e tamén para reinvidicar a importancia que ten a poesía como forma fermosa e creativa de empregar as palabras. 

O día da Árbore, tamén o 21 de Marzo, comezou a conmemorarse aquí en España, en 1972, é dicir, fai xa 53 anos, para que pensemos e valoremos a importancia que teñen as árbores. Grazas a elas temos algo esencial sen o que non poderiamos vivir....o osíxeno! Ademais de que nos axudan a controlar a calor, dándonos sombra, froitos, flores, papel, madeira...Sen esquecer que os bosques son a casiña de moitos e moitos animais que nos encantan e que temos a obriga  e o deber de protexer e coidar. 

Finalmente, o 22 de Marzo, é o Día Mundial da Auga. Día sinalado no calendario para reflexionar sobre a necesidade de coidar a auga.  Porque igual que non podemos vivir sen osíxeno, non podemos vivir sen auga. Imaxinades unha vida sen ela?  Como saciariamos a sede? Como nos duchariamos?Como cociñariamos? Francamente sería imposible. 

 Así, todo o cole participou no recitado de poemas acompañando a plantación da primeira árbore froiteira  que incorporamos na zona verde do noso cole: UNHA PEREIRA, e que bautizamos como AVELEIRA! 

Na biblioteca Xalín seleccionou entre os seus fondos aqueles libros que podían axudar ao alumnado e mesmo ao profesorado  para esta  proposta. 

SEMANA DA PRENSA do 10 ao 14 de MARZO

 

A prensa é un excelente recurso no proceso educativo. Son innumerables os beneficios que aporta: esperta o interese por aprender, a creatividade,  estimula a lectura, e mesmo propicia o desenvolvemento das habilidades implicadas na escritura comezando polo ordenamento de ideas, a redacción e a expresión.  

 Así foi como Xalín pensou que sería unha idea estupenda enviar un exemplar do PAPAGAIO, xornal da biblioteca, a cada unha das aulas para conmemorar esta semana tan especial. E sorpresa maiúscula, cando  descubrimos que o xornal mensual de Marzo, fai referencia ao día da Muller coa sección: Miss Automóbil, onde puidemos aprender dispositivos do día a día inventados por xeniais  mulleres. 

Na biblioteca espéranvos máis PAPAGAIOS!! 

8M- DÍA INTERNACIONAL DA MULLER

 

8 de Marzo, 8M, é unha data clave para conmemorar a loita pola igualdade de xénero e os dereitos das mulleres así como a súa participación en todos os ámbitos da sociedade.  Non debemos esquecer que moitos destes dereitos dos que hoxe gozamos son o froito da incansable perseverancia das mulleres traballadoras do pasado.

No noso centro educativo neste día tan sinalado reflexionamos sobre as nosas mulleres : nais, irmás, avoas, bisavoas, curmás, tías, veciñas, amigas, ...que día a día nos axudan, nos queren, serven de exemplo e son faro nas nosas vidas.

Por iso, todos os nenos/as debuxaron a unha das súas mulleres, porque hoxe son as protagonistas, saen á escena. Entre todos /as crearon un fermoso e emotivo mural reinvindicativo sobre a súa importancia na sociedade. Toda homenaxe e recoñecemento sempre será moi merecido, e non so hoxe, senon os 365 días do ano.

E nesta data tan sinalada, tivemos tamén o pracer e a sorte de coñecer a Silvia Lucena, Sarxento da Garda Civil da provincia de Lugo, primeira muller que coordina os equipos de atestados de tráfico. Sen dúbida, un gran exemplo de que non hai barreiras para quen avanza con determinación, esforzo e traballo. Cada día é unha oportunidade para facer historia, e por que non?

Sementar valores, 

para recoller futuro.

Un gran lema.

Grazas Silvia Lucena, polo teu labor educativo, pero tamén por ser unha inspiración para as novas xeracións, o reflexo de que se pode,  sen limitacións. Grazas pola túa implicación, disposición e colaboración ante todas as nosas inquedanzas.

Aquí vos deixamos unhas fotos da xornada, un día especial.

AGASALLO LECTOR!

Nada como voltar destas curtas, pero intensas, vacacións de Entroido e recibir este marabilloso agasallo lector que nos fai Ana Meilán" Xertrudis precisa vacacións" . 

Estamos totalmente de acordo que Xertrudis merece tomarse un respiro despois de tanto traballo. Non vos podedes perder estas novas aventuras desta bruxiña tan intrépida.  Xa esta dispoñible na casiña de Xalín!

Mil grazas Ana Meilán por este pedazo agasallo e por facernos soñar a través da lectura a nenos/as e maiores.