OS NOSOS MAIORES TEÑEN A PALABRA

Dentro do programa Lectura e Familias Xalín propuxo aos nenos/as que fixesen unha recompilación dos refráns, ditos, adiviñas.... dos seus maiaores (avós, avoas, bisavós...)Nesas palabras hai tesouros esquecidos, palabras que caeron en desuso e que poden e deben recuperarse xa que teñen un valor incalculable. 

Actividades como estas convídannos  a reflexionar sobre todo  o que os nosos maiores nos poden aportar;  unhas vidas cargadas de sabedoría e experiencia das que temos moito que aprender. 

Comparte tempo con eles e escóitaos coa máxima atención,porque hoxe máis que nunca...eles teñen a palabra!

Graciñas familias pola vosa colaboración!

   17 DE MAIO  DÍA DAS LETRAS GALEGAS

No seguinte KAHOOT tedes 15 preguntas sobre a vida e obra de Florencio Manuel Delgado Gurriarán.

KAHOOT

 

                    UNHA VISITA MOI ESPERADA: PAULA CARBALLEIRA.

Cando en xaneiro os nenos e as nenas de 4º  comezaban a andaina no Club de Lectura, a través da obra "Pan con chocolate", non se imaxinaban que ademais de: ler, imaxinar, crear, xogar, escribir e merendar pan con chocolate😋, ían poder coñecer  en persoa e "entrevistar" a súa fabulosa autora!!!

Pero sí,  por fin, chegou o día, o 9 de maio! Paula Carballeira, brillante escritora, actriz e contacontos, cun dominio espectacular da arte de narrar historias, transportounos   a todos  ao mundo da imaxinación, da creación e da creatividade nun ambiente distentido de ledicia e sorriso permanente.

A obra, "Pan con chocolate" é  unha orixinal homenaxe ao irrepetible Gianni Rodari, pedágogo e escritor italiano namorado  da fantasía  e creador do xogo de imaxinación "binomio fantástico" .  E, despois do descubrimento deste libro de mil e unha historias, concluímos que " Paula Carballeira" e "maxia" son, tamén, un binomio fantástico.

Grazas por todo, grazas por tanto.  

Esperamos verte moi pronto de novo! As portas do CEIP PLURILINGÜE POETA AVELINO DÍAZ estarán sempre abertas.

Deixamos aquí un vídeo con algúns momentos da visita.

 23 DE ABRIL - DÍA DO LIBRO 

A lectura é unha ventá aberta ao mundo  e  para viaxar lonxe, non hai mellor nave que un libro

( Emily Dickinson)

O 23 de abril é unha data moi especial no ámbito literario porque este mesmo día en 1616 falecían Miguel de Cervantes e William Shakespeare, dous dos escritores máis coñecidos da historia. Así, a Conferencia Xeral da  UNESCO  estableceu, dende 1995, este día como data simbólica para rendir homenaxe á literatura e alentar á poboación a gozar da lectura.

Para conmemoralo todo o alumnado do centro implicouse na creación dun conto colaborativo  que tivo como protagonista a Avelino Díaz, o noso poeta.  No libro " As viaxes de Avelino"  podemos  "cruzar o charco" da súa man e embarcarnos con el nas súas mil e unha aventuras.  

Nos vos podedes perder o seguinte vídeo: 

e tamén vos deixamos unhas fotos do libro: 

Grazas a todos/as participantes! 

Finalmente, queremos trasladar o noso agradecemento á Librería Pedregal polo magnífico agasallo no día do Libro.  Foi unha sorpresa moi emotiva tanto para nenos/as como para mestres/as. Moitísimas grazas!

 LECTURA E FAMILIAS

Dentro do programa "Lectura e familias", hoxe 7 de abril, levouse a cabo unha fabulosa actividade para o alumnado de 1º e 2º e as súas respectivas familias. Todos eles estaban convidados a coñecer á escritora, guionista, presentadora....Yolanda Castaño!

O encontro tivo lugar no salón de actos da Casa da Cultura de Meira e, durante o mesmo, os nenos e as nenas puideron interaccionar coa autora de libros coma " Coller as rendas".

Foi unha xornada sen dúbida moi, moi especial!

 ENCONTROS PLAMBE

Aproveitamos este medio para contarvos que estivemos presentes o día 25/3/2022, a través dunha integrante do Equipo da Biblioteca, nos encontros organizados en Santiago de Compostela dentro do PLAMBE! Alí atopamos na exposición o noso cartel. 

Un cartel que abre ao mundo a vida do noso centro. 

Sen vós esto non sería posible. Grazas por tanto. 

                                                 21 DE MARZO- DÍA DA POESÍA 

                                                        "POESÍA EN FAMILIA"

Este ano para celebrar o día DÍA da POESÍA, pensamos que crear poemas en familia  sería un fermoso momento para compartir e xogar coas palabras, cos versos, coas rimas, coas estrofas...

Un tempo para deixar voar a imaxinación e converterse en grandes poetas e poetisas. E, así, foi como xurdiu  a actividade "Poesía en familia" dentro do Programa Lectura e Familias. 

           A  nosa iniciativa tivo unha gran acollida e pronto comezaron a chegar moitos e diversos            poemas,           poemas moi creativos e cargados de sentimento. Por tanto,  e como non podía ser doutro xeito,                    despois de valorar toda a implicación e adicación das familias participantes, organizamos un acto               para facer entrega conxunta dos merecidos agasallos.  Foi unha cerimonia preciosa e para nós un verdadeiro            pracer poder contar con vós.  Aquí vos deixamos unhas fotos, testemuña do valor deste momento. 

Ademais contamos con moitos nenos/as voluntarios/as que se animaron a recitarnos o seu poema acompañados polos seus familiares. Que gozada poder desfrutar da poesía todos xuntos!

 

E, se todo isto fose pouco, temos que contarvos que neste acto inauguramos tamén un moderno e chulísimo  graffiti de Rosalía de Castro a cargo de Rubén (da empresa Trece Trazos). O noso agrademento tamén, dende aquí, á área de Cultura da Deputación de Lugo. 

Non podíamos contar cun mellor escenario para festexar o día da Poesía!!

AS BIBLIO MOCHILAS

 AS MOCHILAS DE XALÍN XA SAIRON RUMBO ÁS NOSAS  CASIÑAS !!

  UNHA EXPERIENCIA NOVA 

 AS MOCHILAS DA BIBLIOTECA

 QUE GANAS!! MAÑÁ VENRES EMPEZAMOS POR FIN

 O PRÉSTAMO DE XOGOS E CONTOS

 DA BIBLIO DE XALÍN!

CADA VENRES ESCOLLEREMOS UN CONTO E XOGO PARA LEVAR

 Á CASA DURANTE UNHA SEMANA, E 

TAMÉN UN LIBRIÑO DE TAREFAS DE XALÍN!! 

OS LIBROS E OS XOGOS ESTÁN XA ESPERANDO...

   

8 DE MARZO 

DÍA INTERNACIONAL DA MULLER

Neste día conmemorase a loita da muller por participar, en igualdade co home, na sociedade e no seu desenvolvemento íntegro como persoa. Reflexo desa loita incansable atopámolo nas  avoas;  mulleres sempre partícipes na vida dos nosos nenos e nenas, superavoas con superpoderes.

Estas mulleres dunha forza inquebrantable sempre teñen preparada a manta contra o frío, o paraugas contra a chuvia, a cura para a ferida... Por iso, toda homenaxe que lles poidamos facer é máis que merecida. 

Así, partindo da lectura de libros tales como

elaboramos un mural coas fotografías das avoas de todos os nenos/as do centro. Imaxes acompañadas de textos onde cada alumno/a nos contou o superpoder da súa avoa. 

O resultado foi un mural emotivo e creativo a partes iguais, un fermoso agradecemento a estas supermulleres. 

Esta actividade, xunto coa lectura do "MANIFESTO" por parte dos alumnos/as de 5º e 6º de Ed. Primaria, formou parte dos actos programados polo Concello de Meira, aos que tamén se uniron o IES Pedregal de Irimia e a Escola Superior de Música. 

Graciñas avoas!

 23 DE FEBREIRO- DÍA DE ROSALÍA DE CASTRO

Non podía rematar este 23 de febreiro sen unha gran homenaxe a Rosalía de Castro; unha figura indispensable da literatura escrita do S. XIX. Unha novelista e poetisa que merece ser lembrada cada día e, en especial, no día do seu nacemento, por todo o seu esforzo para potenciar e valorizar o galego ao status de lingua culta e por todas as súas liñas adicadas á loita pola independencia, pola liberdade e pola igualdade das mulleres. 

Tan grande foi o seu legado como o é o conxunto das súas obras. Por iso, este ano os nenos e nenas, por clases,  participaron na gravación do recitado de varios dos seus poemas. A día de hoxe podedes escoitalos por toda a vila de Meira, xa que están repartidos por diferentes lugares moi coñecidos  e aos que podedes ter acceso cun sinxelo lector de Códigos QR, de calquera dispositivo móbil. 

Convidámosvos a deixarvos namorar con esta combinación de paseo e poesía, de lecer e cultura. Asi mesmo,  non queremos despedirnos sen darvos algunhas pistas.... De feito, se vos fixades ben nas seguintes fotografías do día da entrega dos Códigos QR, por parte do alumnado de 5º, seguro que xa descubrides a onde debedes acudir para poesía de Rosalía oír. 

Feliz paseo pola vila no día de Rosalía!!

 UN SORBO DE LECTURA

Sempre dicimos que a lectura ábrenos as portas dun novo mundo na nosa mente; un mundo que creamos nós a través do que lemos. Otórganos así o poder de soñar, de ampliar o noso coñecemento e de medrar como persoas desenvolvendo as capacidades de empatía e de espírito crítico a partes iguais. 

Por iso, calquera momento e lugar son oportunidades perfectas para devorar un libro ou unha parte do mesmo. Perseguindo este obxectivo naceu a iniciativa UN SORBO DE LECTURA, na que os nenos/as, poden no tempo de lecer, ao aire libre, gozar dun ratiño de aventura grazas ao alumnado voluntario que será quen se encargará da xestión desta activididade tan enriquecedora.  

Animádevos a probar un sorbo! Esta alumna colaboradora convídavos encantada!