Rematamos o trimestre compartindo; compartindo postais con moi bos desexos para o ano 2026, poemas de recoñecemento e agradecemento aos maiores, cancións, agasallos e, o máis importante, tempo, valores e moito cariño.
O mércores tivemos a sorte e o privilexio de que nos acompañasen na Biblioteca do cole algunhas das persoas usuarias da Residencia de Maiores traéndonos un amplo abano de riquezas: sabedoría, cultura, vivenzas, experiencias e un inestimable afecto en forma de enormes sorrisos e fortes apertas.
Ademais deixáronnos un agasallo precioso feito por elas mesmas, unha coroa de Nadal totalmente artesanal. E, por se fora pouco, unha felicitación e un pack de mochila, libreta e cores grazas á Deputación de Lugo para cada un dos nenos/as.
Os nenos/as pola súa parte foron uns anfitrións e anfitrioas excepcionais entregándolles unhas postais personalizadas que previamente fixeran con moito agarimo nas aulas e unha boliña de Nadal (presente elaborado no colexio coa cortadora láser de Polos Creativos grazas ao marabilloso traballo dunha das nosas compañeiras).
No encontro parte do alumnado voluntario de 5º e 6º recitou poemas escritos do seu puño e letra:
Persoas con historia
As vosas mans gastadas, gardan historia,
nos vosos ollos brilla a luz da experiencia,
no corazón, a forza da paciencia.
A vosa voz é canto de sabedoría
o voso corazón é amor e cariño,
que nos guía o camiño
aquí preto do río Miño.
Persoas maiores, son tesouros da vida,
merecen respecto, agarimo e sempre compañía.
No silencio da tarde,
repousades tranquiliñas
gardando no peito
unhas lembrazas bonitiñas.
Con cada paso que
dades, deixades algo de sabedoría;
con cada sorriso,
unha alegría.
Sodes pontes que unen
pasado e presente,
raíces que sosteñen á
xente;
sempre vos temos en
mente
e sen vós todo sería
totalmente diferente.
Sodes paz e
tranquilidade,
merecedes respecto
sexa cal sexa a idade;
sen vós, que
proporcionades felicidade,
non hai historia, nin
vida, nin humanidade.
Ademais, todo o alumnado compartiu as súas dotes artísticas cantando e tocando instrumentos: maracas, frautas, triángulos...e mesmo unha trompeta e un saxofón!
Un Encontro Interxeracional moi emotivo e enriquecedor para todas as partes. Cremos que as fotos falan por sí soas.
O xoves continuamos compartindo. Voluntarios e voluntarias de 5º e 6º que participan no programa de Bibliotecas Solidarias visitaron a Escola Infantil de Meira, (O Vermiño) para regalarlles aos meniños, meniñas e as súas profes, unha postal de Nadal que crearan tamén con moita dedicación e ilusión.
O recibimento non puido ser máis máxico, desprendéndose tenrura e felicidade nos nenos/as das dúas etapas da infancia. Os e as maiores aportaron coidado e protección; os e as pequeniños/as ilusión, inocencia e ledicia.
O tempo compartido desta volta non puido ser tanto como nos gustaría, chegou a moi pouco, pero saímos co corazón cargadiño de emoción e un fabuloso obsequio.
E, finalmente, entre o xoves e o venres tivo lugar outro intercambio de postais e desexos para o 2026. Por unha banda, o alumnado de 6º de Educación Primaria foi o encargado do deseño e entrega dunha postal ao IES Pedregal de Irimia. Por outra, hoxe recibimos da man do seu director a creada polo alumnado do instituto. Unha tarxeta postal moi creativa e orixinal.
Grazas a tod@s, por facer isto posible, por facer comunidade.
BO NADAL!!
.jpg)
